Taniqli futbolchilardan biri Rikardu Kuarejma Portugaliya chempionati 22-turidan o‘rin olgan «Vitoriya Gimarayesh» hamda «Belenesesh» jamoalari o‘rtasidagi uchrashuvdagi xatti-harakatlari bilan ijtimoiy tarmoqlarni «portlatdi».

Asosiy vaqtdagi to‘xtalishlar uchun qo‘shib berilgan daqiqalar o‘tib borayotgan, 38 yoshli Kuarejmaning jamoasi 0:1 hisobida yutqazayotgan pallada raqib yarim himoyachisi Afonso Souza vaqtni atayin cho‘zishni xohlab, jarohatini ro‘kach qilgan holda, o‘rnidan turishga shoshilmadi. Bu hol Kuarejmaga yoqmadi va Souzaga «yordam berish»ga qaror qildi - Rikardu raqibini qo‘lida ko‘tarib, maydon chetiga olib chiqib qo‘yishga urindi.

Mazkur holat maydonda janjal chiqishiga sabab bo‘ldi. Souzaning sheriklari uni himoya qilib, Kuarejmaga e’tiroz bildira boshlashdi. Natijada, «simulyant»ni «xaloskor»ning qo‘lidan tortib olishdi, referi esa portugaliyalik faxriyni sariq kartochka bilan «siyladi».

Ushbu vaziyat tasvirlangan video lavhalar qisqa muddatda ijtimoiy tarmoqlarga tarqaldi. Uchrashuv Kuarejma jamoasining 0:1 hisobidagi mag‘lubiyati bilan yakunlandi.

Ma’lumot uchun, «Vitoriya Gimarayesh» Portugaliya chempionatida 6-o‘rinni egallab turibdi, «Belenensesh» esa yaqqol autsayder maqomida turnir jadvalining so‘nggi pog‘onasida bormoqda.

Qo‘shimcha qilish kerakki, Kuarejma 2020 yildan buyon «Vitoriya Gimarayesh» sharafini himoya qilmoqda. U joriy mavsum Portugaliya klubi tarkibida 20ta o‘yin o‘tkazib, ularda 1tadan gol va assist qayd etgan.

JAHONGIR tayyorladi