Таниқли футболчилардан бири Рикарду Куарежма Португалия чемпионати 22-туридан ўрин олган «Витория Гимараеш» ҳамда «Беленесеш» жамоалари ўртасидаги учрашувдаги хатти-ҳаракатлари билан ижтимоий тармоқларни «портлатди».

Асосий вақтдаги тўхталишлар учун қўшиб берилган дақиқалар ўтиб бораётган, 38 ёшли Куарежманинг жамоаси 0:1 ҳисобида ютқазаётган паллада рақиб ярим ҳимоячиси Афонсо Соуза вақтни атайин чўзишни хоҳлаб, жароҳатини рўкач қилган ҳолда, ўрнидан туришга шошилмади. Бу ҳол Куарежмага ёқмади ва Соузага «ёрдам бериш»га қарор қилди - Рикарду рақибини қўлида кўтариб, майдон четига олиб чиқиб қўйишга уринди.

Мазкур ҳолат майдонда жанжал чиқишига сабаб бўлди. Соузанинг шериклари уни ҳимоя қилиб, Куарежмага эътироз билдира бошлашди. Натижада, «симулянт»ни «халоскор»нинг қўлидан тортиб олишди, рефери эса португалиялик фахрийни сариқ карточка билан «сийлади».

Ушбу вазият тасвирланган видео лавҳалар қисқа муддатда ижтимоий тармоқларга тарқалди. Учрашув Куарежма жамоасининг 0:1 ҳисобидаги мағлубияти билан якунланди.

Маълумот учун, «Витория Гимараеш» Португалия чемпионатида 6-ўринни эгаллаб турибди, «Белененсеш» эса яққол аутсайдер мақомида турнир жадвалининг сўнгги поғонасида бормоқда.

Қўшимча қилиш керакки, Куарежма 2020 йилдан буён «Витория Гимараеш» шарафини ҳимоя қилмоқда. У жорий мавсум Португалия клуби таркибида 20та ўйин ўтказиб, уларда 1тадан гол ва ассист қайд этган.

ЖАҲОНГИР тайёрлади