Yangi mavsumga jiddiy maqsadlar bilan tayyorgarlik ko‘rayotgan, shu asosda raqobatbardosh tarkib shakllantirayotgan “Navbahor” PFK ayrim futbolchilarning o‘yin amaliyotisiz qolib ketmasliklarini ta’minlash maqsadida ularni boshqa jamoalardan tushgan takliflarga muvofiq ijaraga bermoqda.

Xususan, yarim himoyachi Sardor Telyakov 2022 yilgi mavsumni ijara asosida Yaypanning “Turon” jamoasi safida o‘tkazadigan bo‘ldi. Shuningdek, Abbos G‘ulomov “Neftchi”ga ijaraga berildi. Demak, ushbu futbolchimiz mavsumni Farg‘ona jamoasida o‘tkazadi.

Ma’lumot uchun: Sardor Telyakov Superliganing 2021 yilgi mavsumida 19 o‘yinda maydonga tushib, 1201 daqiqa o‘ynadi va raqiblar darvozasini 2 bor ishg‘ol qildi. Abbos G‘ulomov esa 22 o‘yinda 1202 daqiqa to‘p tepib, 1 ta gol muallifiga aylandi.