Bolgariyaning Sofiya shahrida boks bo‘yicha xalqaro an’anaviy Stranja Kubogi musobaqasining to‘rtinchi kungi bahslari 23 fevral, chorshanba kuni bo‘lib o‘tdi.

-51 kg vazn toifasida harakat qilayotgan Hasanboy Do‘stmatov rossiyalik Yevgeniy Martinovga qarshi ringga chiqdi. O‘zbekistonlik bokschi raqibiga hech qanday imkoniyat qoldirmadi va 5:0 hisobida g‘alaba qozondi.

Bundan avvalgi bosqichda Hasanboyning raqibi ringga chiqmagandi va o‘zbekistonlik bokschi to‘g‘ridan-to‘g‘ri ushbu bosqichga yo‘l olgan edi.

Eslatib o‘tamiz, musobaqaning birinchi kungi bahslarida olti nafar o‘zbekistonlik bokschi jang qildi va barchasi g‘alaba qozondi. Ikkinchi kungi bahslarda 5 nafar bokschi o‘z jangini g‘alaba bilan yakunladi.

22 fevral kungi bahslarda 4 o‘zbekistonlik bokschi ringga ko‘tarildi. Abdumalik Halokov, Odiljon Aslonov va Madiyor Saidrahimov keyinga bosqichga yo‘l olgan bo‘lsa, Rayhona Qodirova Kosovo vakiliga yutqazib qo‘ydi.