O‘zbekiston futbol assosiasiyasi tomonidan 1 mart, seshanba kuni 2022 yilgi rejalar, terma jamoalar faoliyatini sarhisob qilish maqsadida matbuot anjumani tashkil etildi. Bu haqida «Daryo» muxbiri xabar bermoqda.
Anjumanda O‘FA birinchi vise-prezidenti Ravshan Ermatov, assosiasiya vise-prezidenti Odil Ahmedov, O‘zbekiston milliy terma jamoasi murabbiyi Srechko Katanes, ayollar terma jamoasi bosh murabbiyi Honda Midori, bosh kotib Avaz Maqsumov, terma jamoalar bo‘limi rahbari Usmon Toshev, O‘FA media bo‘limi rahbari Davron Fayziyev va boshqalar ishtirok etdi.
O‘FA terma jamoalar bo‘limi boshlig‘i Usmon Toshev milliy terma jamoalarning 2022 yilgi rejalari haqida ma’lumot berib o‘tdi.
O‘zbekiston milliy terma jamoasining iyun oyidagi Osiyo Kubogi—2023 saralash bahslaridagi raqiblari haqidagi savolga bosh murabbiy Srechko Katanes javob berib o‘tdi.
"Guruh bosqichida favoritmiz? Men bunday yondashuvni yoqtirmayman. Jamoalarga past baho berish, yaxshi jamoa, yomon jamoa, deyish yaxshimas. Uzr, lekin men buni yoqtirmayman. O‘zim futbolchi bo‘lganman, hozirda terma jamoa murabbiyiman va shunday holatlar bo‘lgan, kuchsiz jamoalarga yutqazganman. Albatta, biz yaxshimiz. Lekin raqiblarni hurmat qilishimiz lozim. Iyunda bizga raqib bo‘ladigan jamoalarga hurmat bilan qarashimiz kerak. Futbolchilar ham bu narsalarni eshitsa, motivasiyasi pasayadi. Shuning uchun OAV vakillaridan bunday holatda ehtiyot bo‘lishini so‘rab qolardim.
Favorit bo‘lsak-da, futbol 0:0 hisobi bilan boshlanadi. Saralash o‘yinlaridan oldin «chiqib bo‘ldik» degan fikrlarni aytmaslik kerak. Ular himoyaviy o‘yin qiladigan jamoalar, shuning uchun o‘zimizni sinab ko‘rishga imkon bo‘ladi. O‘zim uchun kerakli ma’lumotlarni olaman, bu uchrashuvlarda", — dedi Katanes.
O‘zbekiston milliy terma jamoasi kattaroq jamoalarga qarshi o‘rtoqlik o‘yinlarida ishtirok etishi mumkinligi haqidagi savolga Ravshan Ermatov javob berdi.
"Terma jamoa bir marta Jahon Chempionatiga chiqsa, kattaroq natijalarga erishsa, u jamoalarni o‘zi O‘zbekistonga kelishga ishqiboz bo‘ladi. Mana, futzal natijalarni ko‘rsatdi, Argentina futzal terma jamoasi o‘rtoqlik o‘yiniga kelishga rozi bo‘ldi. Futzal O‘zbekistonda yaxshi, saviyali jamoa borligini ko‘rsatdi. Sentyabr oyida top-jamoa bilan o‘rtoqlik o‘yini o‘tkazish rejamizda bor", — dedi Ravshan Ermatov.
"Muhokamalarni eshitdim. Terma jamoalar haqida, akademiyalar haqida. Hammasi sekin-sekin bo‘ladi. Bu narsa juda uzoq vaqt talab qiladi. Akademiya, boshqa sferalar juda katta loyihalar hisoblanadi. 3 yil ichida hech qanday natija bo‘lmadi deyildi, keyingi 3 yildayam natija kutish noto‘g‘ri. Natija ko‘rish uchun kamida 10–15 yil kutish kerak. Buning uchun barcha infrastruktura bo‘lishi kerak, murabbiylar bo‘lishi lozim, barchasini boshqara oladigan menejerlar kerak, oson jarayon emas. Mendan darhol natija so‘rashingiz mumkin. Iyun oyida natija ko‘rsatishim kerak", — deya ishshimcha qildi O‘zbekiston milliy jamoasi bosh murabbiyi Srechko Katanes.
