Ўзбекистон футбол ассоциацияси томонидан 1 март, сешанба куни 2022 йилги режалар, терма жамоалар фаолиятини сарҳисоб қилиш мақсадида матбуот анжумани ташкил этилди. Бу ҳақида «Дарё» мухбири хабар бермоқда.
Анжуманда ЎФА биринчи вице-президенти Равшан Эрматов, ассоциация вице-президенти Одил Аҳмедов, Ўзбекистон миллий терма жамоаси мураббийи Сречко Катанец, аёллар терма жамоаси бош мураббийи Ҳонда Мидори, бош котиб Аваз Мақсумов, терма жамоалар бўлими раҳбари Усмон Тошев, ЎФА медиа бўлими раҳбари Даврон Файзиев ва бошқалар иштирок этди.
ЎФА терма жамоалар бўлими бошлиғи Усмон Тошев миллий терма жамоаларнинг 2022 йилги режалари ҳақида маълумот бериб ўтди.
Ўзбекистон миллий терма жамоасининг июнь ойидаги Осиё Кубоги—2023 саралаш баҳсларидаги рақиблари ҳақидаги саволга бош мураббий Сречко Катанец жавоб бериб ўтди.
"Гуруҳ босқичида фаворитмиз? Мен бундай ёндашувни ёқтирмайман. Жамоаларга паст баҳо бериш, яхши жамоа, ёмон жамоа, дейиш яхшимас. Узр, лекин мен буни ёқтирмайман. Ўзим футболчи бўлганман, ҳозирда терма жамоа мураббийиман ва шундай ҳолатлар бўлган, кучсиз жамоаларга ютқазганман. Албатта, биз яхшимиз. Лекин рақибларни ҳурмат қилишимиз лозим. Июнда бизга рақиб бўладиган жамоаларга ҳурмат билан қарашимиз керак. Футболчилар ҳам бу нарсаларни эшитса, мотивацияси пасаяди. Шунинг учун ОАВ вакилларидан бундай ҳолатда эҳтиёт бўлишини сўраб қолардим.
Фаворит бўлсак-да, футбол 0:0 ҳисоби билан бошланади. Саралаш ўйинларидан олдин «чиқиб бўлдик» деган фикрларни айтмаслик керак. Улар ҳимоявий ўйин қиладиган жамоалар, шунинг учун ўзимизни синаб кўришга имкон бўлади. Ўзим учун керакли маълумотларни оламан, бу учрашувларда", — деди Катанец.
Ўзбекистон миллий терма жамоаси каттароқ жамоаларга қарши ўртоқлик ўйинларида иштирок этиши мумкинлиги ҳақидаги саволга Равшан Эрматов жавоб берди.
"Терма жамоа бир марта Жаҳон Чемпионатига чиқса, каттароқ натижаларга эришса, у жамоаларни ўзи Ўзбекистонга келишга ишқибоз бўлади. Мана, футзал натижаларни кўрсатди, Аргентина футзал терма жамоаси ўртоқлик ўйинига келишга рози бўлди. Футзал Ўзбекистонда яхши, савияли жамоа борлигини кўрсатди. Сентябрь ойида топ-жамоа билан ўртоқлик ўйини ўтказиш режамизда бор", — деди Равшан Эрматов.
"Муҳокамаларни эшитдим. Терма жамоалар ҳақида, академиялар ҳақида. Ҳаммаси секин-секин бўлади. Бу нарса жуда узоқ вақт талаб қилади. Академия, бошқа сфералар жуда катта лойиҳалар ҳисобланади. 3 йил ичида ҳеч қандай натижа бўлмади дейилди, кейинги 3 йилдаям натижа кутиш нотўғри. Натижа кўриш учун камида 10–15 йил кутиш керак. Бунинг учун барча инфраструктура бўлиши керак, мураббийлар бўлиши лозим, барчасини бошқара оладиган менежерлар керак, осон жараён эмас. Мендан дарҳол натижа сўрашингиз мумкин. Июнь ойида натижа кўрсатишим керак", — дея ыщшимча қилди Ўзбекистон миллий жамоаси бош мураббийи Сречко Катанец.
