Fransiyaning «PSJ» klubi «Monako» jamoasiga Kilian Mbappe uchun bonuslarning bir qismini to‘lamoqchi emas.

Le Parisien xabariga ko‘ra, klublar o‘rtasidagi kelishuvda parijliklar hujumchi uchun 145 million yevro to‘lashi ko‘zda tutilgan. «PSJ» Mbappe klub bilan shartnomasini uzaytirsa, yana 35 million yevro bonus sifatida berishi taxmin qilingandi.

«PSJ» fransiyalik hujumchi bilan yangi shartnoma imzolash uchun hamma narsani qilmoqda, biroq ayni paytda «Monako»ga bu 35 million yevroni to‘lamoqchi emas va buning oldini olish yo‘llarini qidirmoqda.

Mbappe iyul oyida PSJ bilan yangi shartnoma imzolashi varianti ko‘rib chiqilmoqda. Texnik jihatdan bu shartnomaning uzaytirilishi emas, balki yangi shartnoma imzolanishi bo‘ladi, chunki futbolchining amaldagi shartnomasi 30 iyunda tugaydi.

Joriy mavsumda 23 yoshli hujumchi Liga 1ning 24 ta uchrashuvida 14 ta gol urdi va 10 ta golli uzatmani amalga oshirdi.