Superliganing 1-turidan o‘rin olgan “Bunyodkor” – “So‘g‘diyona” (0:0) uchrashuvidan so‘ng mezbonlar bosh murabbiyi Shuhrat Maqsudov o‘z fikrlari bilan o‘rtoqlashdi.
- Avvalambor, futbol muxlislarini 2022 yilgi mavsum boshlangani bilan tabriklayman! Opa-singil va onalarimizni bayramlari bilan qutlayman! Bugun qiyin o‘yin bo‘lishi aniq edi. Har holda chempionatning ilk uchrashuvi. “So‘g‘diyona”ni qanday jamoa ekanligini bilamiz. Muxlislarga o‘yin yoqdi deb o‘ylayman. Fursatdan foydalanib, futbolchilarimga borini berib o‘ynaganliklari uchun yana bir bor rahmat!
Jahongir O‘rozov va Mahmud Mahammadjonov Superligada debyut qilishdi. Hayajon bo‘lishi oddiy hol. Futbolchilar bilan ikki oy ichida o‘ziga ishonishlarini, hech kimdan kam emasliklarini quloqlariga quydim. Homiyimiz Turkiyada yig‘in o‘tkazishga yordam berdi. Buning uchun Mehriddin Abdullayevga minnatdorchilik bildiraman! Xorij yig‘inida yoshlar o‘zlariga ishonch olishdi. Yosh futbolchilarda beqarorlik bo‘lishi tabiiy. Vaqt o‘tgani sari o‘z yo‘liga tushadi.
