"Barselona" hujumchisi Pyer-Emerik Obameyang Ispaniya jamoasida o‘ynash uchun maoshini sezilarli darajada kamaytirgan. Bu haqda moliyaviy ekspert Rob Uilsonga tayanib Football Espana xabar bermoqda.

Londonning “Arsenal” klubida 32 yoshli gabonlik hujumchi haftasiga 362 ming yevro maosh olardi. Tomonlar qishki transfer oynasida shartnomani bekor qilishdi, shuning uchun "Barselona" Obameyangni tekinga o‘z safiga qo‘shib oldi. Ispan klubi moliyaviy jihatdan cheklangani tufayli futbolchiga haftasiga 116 ming yevrodan ko‘p bo‘lmagan maosh to‘lashi mumkinligini ma’lum qildi. Obameyang bunday shartlarga rozi bo‘ldi va 2023 yilda ixtiyoriy bekor qilinishi mumkin bo‘lgan 2025 yilgacha tuzilgan shartnoma imzoladi.

Ma’lum bo‘lishicha, gabonlik futbolchiga shu yilning yozida yaxshilangan shartnoma taklif qilinadi.