Taniqli jurnalist, sport sharhlovchisi Davron Fayziyev o‘z Telegram sahifasida Superliga 1-turidan o‘rin olgan "Navbahor" - "Nasaf" (0:0) o‘yini haqida fikr bildirdi.
"Superliga boshlandi, super afisha bilan. Transferlar bozorini yondirgan "Navbahor' va eng yoqimli o‘yinga ega "Nasaf". To‘lib toshgan stadion, bayramona atmosfera, terma jamoaga nomzod futbolchilar, Xayrulla akaning chiqishlari, hammasi zo‘r boshlandi. O‘yin ham ancha saviyali bo‘ldi. Yuqori temp va jang. Agar shu ikkita faktor bo‘lmasa 3:3 ham zerikarli tuyuladi. Bu vaziyatda esa nollar bilan tugagan uchrashuvni oxirigacha tomosha qilish qiziqarli bo‘ldi. Muhimi davomiylik. Chempionat oxirigacha shunday o‘tsin, temp tushib ketmasin, barcha stadionlarda. "Navbahor" tarkibi ancha qudratli ko‘rindi. Ayniqsa Boltaboyev uchun hursandman, yana qayta kashf etiladi deb umid qilamiz. Bugun chempionlikka da’vogar top to‘rtlikdan 3 tasini ko‘rdik. To‘rtinchisi kim deysizmi? Yana ozgina kuzataylikchi, alohida to‘xtalamiz", - deb yozdi Fayziyev.