O‘zbekiston termasi o‘zining 30 yillik tarixida OFKga a’zo 34ta jamoaga qarshi o‘ynab ko‘rgan. Maldiv termasi ushbu ro‘yxatga 35-raqib sifatida kiradi, zero, Namanganda o‘tadigan uchrashuv tarixdagi ilk qarama-qarshilik bo‘ladi. Termamiz shri-lankaliklar bilan bor-yo‘g‘i bir bora to‘qnash kelishgan - 2000 yilgi Osiyo kubogi saralashida. 1999 yilning noyabr oyida BAAda o‘tgan bahs O‘zbekiston termasining 6:0 hisobidagi g‘alabasi bilan yakunlangan edi. Vakillarimiz Tailand milliy jamoasi bilan jami 7 marta o‘yin o‘tkazib, ularning 3tasida zafar quchishgan, 4tasida imkoniyatni boy berishgan. To‘plar nisbati: 15-17.

***
OK-2023 saralash turniri o‘yinlari 8, 11 va 14 iyun kunlari markazlashgan tizimda Quvayt, Mo‘g‘uliston, O‘zbekiston, Hindiston, Malayziya va Qirg‘iziston (guruhlar ketma-ketligi)da bo‘lib o‘tadi. «S» guruhi uchrashuvlariga Namangan mezbonlik qilsa, «F» kvarteti bahslari Bishkekda tashkil etiladi. Turnirning final bosqichiga guruhlarda g‘olib chiqqan jamoalar va eng yaxshi ko‘rsatkichga ega 5ta ikkinchi o‘rin egasi yo‘l oladi.

***
Darvoqe, 2004 yilgi Osiyo kubogi saralashida Tailand termasiga qarshi 2ta o‘yin o‘tkazgandik. Dastlab 2003 yilning 8 noyabr kuni biznikilar Toshkentda Vladimir Shishelov o‘z tug‘ilgan kunida qayd etgan «dubl» evaziga 3:0 hisobida g‘alaba qozonishgan. Oradan 2 hafta o‘tib, Bangkokda O‘zbekiston termasining 1:4 hisobida yutqazishi oqibatida Xitoyda o‘tgan final bosqichiga tailandliklar yo‘l olib, tojikistonliklar musobaqadan chetda qolishgandi.