Ozarbayjonning «Qorabog‘» klubi Yevropa Konferensiyalar Ligasidagi ishtirokini to‘xtatdi. Jamoa bosh murabbiyi Gurban Gurbanovning o‘yin vaziyatiga to‘g‘ri yondashuvi esa 1/16 final bosqichining o‘ziga xos chiroyli voqeligiga aylandi.

Asosiy nyuanc shuki, Konferensiyalar Ligasida VARdan foydalanilmayapti. Xullas, Ozarbayjon poytaxtida bosh hakam inson omili faktori tufayli holatni to‘g‘ri baholay olmadi va qo‘l yordamida urilgan golni inobatga oldi. Gap uchrashuvning 34-daqiqasida chap qanotdan amalga oshirilgan hujum yakunida yuzaga kelgan holat xususida: hujumchi Ibraim Vaji to‘pni chindan ham, qo‘li bilan darvozaga to‘g‘rilab qo‘ydi. Polshalik referi Bartosh Frankovski esa buni bosh bilan yo‘llangan zarbadek ko‘rdi, shekilli, darhol maydon markaziga ishora qildi - gol!

Tabiiyki, raqib - «Marsel» futbolchilari sinxron ravishda referini qurshab olib, qoidabuzarlik borligini tushuntirishga urinishdi. Gurbanov ayni shu lahzada vaziyatga aralashdi: u bosiqlik bilan jamoa sardori Maksim Medvedevga nimalarnidir tushuntirdi. «Qorabog‘» sardori shundan so‘ng hakam oldiga yugurib borib, unga hammasini yetkazdi. Shu tariqa Frankovski mezbonlar golini bekor qildi. Ajoyib yondashuv, hurmatga loyiq halollik!

«Qorabog‘» yakunda 0:3 hisobida yengildi (ikki o‘yinning umumiy natijasi - 1:6). Muhimi, «Qorabog‘» o‘z tarixida ilk marta yevrokuboklar «pley-off» bos­qichida o‘ynadi va bosh murabbiyning olijanobligi tufayli yaxshigina voqea bilan nazarga ham tushdi.