Ispaniya La Ligasining 27-turidan o‘rin olgan o‘yinlar 5 mart, shanba kuni bo‘lib o‘tdi.

«Real» Madridda «Real Sosyedad»ni qabul qilib, 4:1 hisobidagi g‘alabani tantana qildi. Dastlab mehmonlar uchrashuvning 10-daqiqasida Mikel Oyarsabal tomonidan penaltidan urilgan gol evaziga hisobni ochishgandi.

Birinchi bo‘lim so‘ngida Eduardo Kamavinga va Luka Modrich uzoq masofadan ajoyib gollar urib, mezbonlarni oldinga olib chiqqan bo‘lishsa, ikkinchi taymda Karim Benzema 11 metrlik jarima zarbasini golga aylantirdi. Shuningdek, Marko Asensio ham o‘z nomini tabloga yozdirib qo‘ydi.

Karlo Anchelotti shogirdlari ushbu g‘alabadan keyin ochkolari sonini 63 taga yetkazib olib, 1-o‘ringa mustahkam o‘rnashib oldi. Hisobida 44 ochko bo‘lgan «Real Sosyedad» 6-pog‘onani band etib turibdi.

La liga, 27-tur
5 mart, shanba
«Real» – «Real Sosyedad» 4:1
Gollar: 0:1 – 10, penalti Oyarsabal, 1:1 – 40 Kamavinga, 2:1 – 43 Modrich, 3:1 – 76, penalti Benzema, 4:1 – 79 Asensio.
«Real»: Kurtua, Karvaxal (Vaskes, 84), Alaba, Militao, Mendi, Modrich (Sebalyos, 82), Kazemiro, Kamavinga, Benzema (Mariano Dias, 84), Vinisius Junior (Marselo, 82), Rodrigo (Asensio, 77).
«Real Sosyedad»: Remiro, Saldua (Elustondo, 64), Le Norman, Pacheko (Rafinya, 46), Gorosabel, Ilyarramendi (Subimendi, 64), Merino, Subeldiya, Silva (Juaxra, 46), Isak (Serlot, 80), Oyarsabal.
Ogohlantirishlar: Saldua (58), Merino (81).