Yevropada ko‘pchilik Klublar o‘rtasidagi JCHni uncha qadrlamaydi. Deylik, «ko‘hna qit’a» jamoalari muxlislari turnirning bosh sovriniga «plastik kubok» sifatida qarashadi. Boshqa qit’a vakillari uchun esa klublar mundiali katta futbol muhitini sinab ko‘rish imkoniyati, albatta.
Joriy yil BAAda tashkillashtirilgan Klublar o‘rtasidagi JCH-2021da Afrika nomidan qatnashgan «Al-Ahli» (Misr) 3-o‘rinni egalladi. Misrliklar «bronza» uchun o‘yinda Saudiya Arabistonining «Al-Hilol» klubidan ustun kelishdi. Qohira jamoasi murabbiyi Pitso Masimane shundan so‘ng turnir finalini ham kuzatdi va yakunda «Chelsi» futbolchilari bilan uchrashib, maqsadiga erishdi. Aniqrog‘i, Janubiy afrikalik mutaxassis Meyson Maunt futbolkasini so‘rab oldi. O‘zi uchun, emas, albatta. «Meyson Maunt libosi... Yo‘q, formani o‘zim emas, qizim uchun oldim. U aynan shu futbolchi o‘yinini yaxshi ko‘radi va har doim «Meyson Maunt, Meyson Maunt», deb yuradi. Mana, Meyson bilan gaplashdim va u futbolkasini sovg‘a sifatida berdi».
Pitso Masimane shuningdek, N~Gole Kantega ham alohida to‘xtaldi: «Kantega kelsak, uning kamtarligini aqlga sig‘dirish qiyin. Qarang, futbolda katta yutuqlarga erishdi, lekin hamon o‘ta kamtar yigit. Keng ko‘lamdagi muvaffaqiyatlardan so‘ng odamning kamtarlikni qanday saqlab qolishi va atrofidagilarga yaxshi munosabatda bo‘lishi sirini tushunmayman, ochig‘i...». Ha, afrikaliklar Kantening olijanobligidan hayratdalar, xuddi boshqalar qatori.
