Braziliyalik Tyago Silvaning faoliyatiga har qanday futbolchi havas bilan boqsa kerak. Uni bemalol «sovrinyutar» iborasi bilan ta’riflash mumkin. Qarang, Braziliya terma jamoasi va «Chelsi» klubi himoyachisi qatorasiga 12 yildan buyon kubok yutish bobida o‘ziga xos seriya qayd etmoqda. Shunchaki, ajoyib!
Tyagoning ushbu ajib seriyasi mavsum-2010|2011da boshlangan edi. Braziliyalik futbolchi shundan buyon har mavsum o‘z kolleksiyasini kamida 1ta sovrin bilan boyitmoqda. Diqqat qiling, Silva bu oraliqda 3 marta mavsumni 4tadan sovrin bilan yakunladi. Joriy yil boshida BAAda tashkillashtirilgan Klublar o‘rtasidagi JCH-2021ning bosh sovrini esa futbolchi uchun ushbu seriya hisobidan 28-sovrin bo‘ldi.
Tyago Silvada bu yil yana sovrin yutish imkoniyati yo‘q emas. Ha, APLda oltin medal olish masalasi qiyin, lekin CHL va Angliya kubogi bor. Londonliklar yevrokubokning 1|8 finalida «Lill» to‘sig‘idan o‘tishga yaqinlar, mamlakat kubogi chorak finalida esa «Midlsbro» bilan kuch sinashishadi.
