Britaniyalik milliarder Nik Kendi shu haftada Roman Abramovichga «Chelsi» uchun 2,5 milliard funt sterling taklif qiladi, deb yozmoqda The Daily Mail.

Manbaning aytishicha, taklif «Stemford Brij»ni 1,5 milliard funt sterlinglik qayta qurish rejasini o‘z ichiga oladi. Hashamatli ko‘chmas mulk ishlab chiqaruvchisi hozirda bir qator amerikalik investorlar bilan klubni sotib olish uchun konsorsium tuzish bo‘yicha muzokaralar olib bormoqda.

«Nik Kendi «Chelsi»ni sotib olishning bir qancha imkoniyatlarini faol ravishda o‘rganmoqda. Har qanday taklif boshqa tomon (yoki konsorsium) bilan birgalikda amalga oshiriladi va bizda bir nechta xalqaro hamkorlarning jiddiy takliflari bor.

Janob Kendi «Chelsi»ga qiziqish bildirmoqda. Uning otasi klubga muxlislik qiladi va uning o‘zi ham to‘rt yoshidan beri «Stemford Brij»dagi o‘yinlarni tomosha qilgan.

Janob Kendining ko‘chmas mulk bo‘yicha o‘ziga xos tajribasi bor va buni amalga oshirish nihoyatda katta ish bo‘lardi», — dedi milliarderning vakili.

Eslatib o‘tamiz, Abramovich «Chelsi»ni sotishdan kamida 3 milliard funt ishlab olishni rejalashtirmoqda. Rossiyalik tadbirkor klubni 2003 yilda 140 million funt sterlingga sotib olgan. U Ukrainadagi vaziyat tufayli kiritilgan Rossiyaga qarshi sanksiyalar tufayli aktivni sotishga majbur.