Британиялик миллиардер Ник Кэнди шу ҳафтада Роман Абрамовичга «Челси» учун 2,5 миллиард фунт стерлинг таклиф қилади, деб ёзмоқда The Daily Mail.

Манбанинг айтишича, таклиф «Стемфорд Бриж»ни 1,5 миллиард фунт стерлинглик қайта қуриш режасини ўз ичига олади. Ҳашаматли кўчмас мулк ишлаб чиқарувчиси ҳозирда бир қатор америкалик инвесторлар билан клубни сотиб олиш учун консорциум тузиш бўйича музокаралар олиб бормоқда.

«Ник Кэнди «Челси»ни сотиб олишнинг бир қанча имкониятларини фаол равишда ўрганмоқда. Ҳар қандай таклиф бошқа томон (ёки консорциум) билан биргаликда амалга оширилади ва бизда бир нечта халқаро ҳамкорларнинг жиддий таклифлари бор.

Жаноб Кэнди «Челси»га қизиқиш билдирмоқда. Унинг отаси клубга мухлислик қилади ва унинг ўзи ҳам тўрт ёшидан бери «Стемфорд Бриж»даги ўйинларни томоша қилган.

Жаноб Кэндининг кўчмас мулк бўйича ўзига хос тажрибаси бор ва буни амалга ошириш ниҳоятда катта иш бўларди», — деди миллиардернинг вакили.

Эслатиб ўтамиз, Абрамович «Челси»ни сотишдан камида 3 миллиард фунт ишлаб олишни режалаштирмоқда. Россиялик тадбиркор клубни 2003 йилда 140 миллион фунт стерлингга сотиб олган. У Украинадаги вазият туфайли киритилган Россияга қарши санкциялар туфайли активни сотишга мажбур.