19 mart kuni O‘zbekiston Professional futbol ligasiga a’zo barcha klub o‘zining O‘zbekiston kubogidagi raqiblarini bilib oladi. Jarayon «Sport» telekanali orqali soat 21:20 dan boshlab jonli efirda ko‘rsatiladi.
Guruh bosqichida 2021 yilgi mavsumda bo‘lgani kabi 24 ta jamoa kurash olib boradi. «Paxtakor» OFK Chempionlar ligasining guruh bosqichi ishtirokchisi sifatida musobaqaga 1/8 finaldan e’tiboran qo‘shiladi. «Nasaf» klubi 15 mart kuni «Baniyas»ni taslim qila olsa, turnirni 1/8 finaldan boshlaydi, yo‘qsa u ham guruh bosqichidagi raqiblarini 19 mart kuni bilib oladi.
Shu kuni musobaqaning saralash bosqichiga ham qur’a tashlab beriladi. Saralash o‘yinlari haqida birozdan so‘ng aniqroq ma’lumot taqdim etiladi.
Shuningdek, an’anaga ko‘ra 2022 yilgi kubok finaliga mezbonlik qiluvchi stadion nomiga ham qur’a yordamida aniqlik kiritib olinadi. Da’vogar stadionlar O‘zbekiston futbol assosiasiyasi bilan kelishilgan holda qur’aga qadar ma’lum qilinadi.
