Superliganing 2-turidan o‘rin olgan “Qizilqum” – “Bunyodkor” (3:1) uchrashuvidan keyin mehmonlar ustozi Shuhrat Maqsudov o‘z fikrlari bilan o‘rtoqlashdi.
- Bugun maydonga tushgan yosh futbolchilarimizga katta rahmat aytaman! “Bunyodkor”ning maqsadi akademiyadan ko‘proq yoshlarni asosiy tarkibga jalb qilish. Ularning o‘yinidan qoniqdim, albatta biroz tajriba yetishmadi. Ammo yaqin kelajakda ular O‘zbekiston terma jamoasida o‘ynaydi degan umiddaman. “Qizilqum” jamoasini g‘alaba bilan tabriklayman! Bekor qilingan gol haqida gapirmayman, bu mening ishim emas. Nimadir deganim bilan hech narsa o‘zgarmaydi.
Akademiya nima uchun? Yosh futbolchilarni asosiy tarkibga jalb qilish uchun. Tayyor futbolchilarni sotib olib o‘ynatishni hamma ham biladi. Lekin bu yil yoshlarga ishonishga qaror qildik. Biz to‘g‘ri yo‘ldamiz, buning uchun vaqt kerak bo‘ladi. Klubimiz rahbari bu vaqtni bizga berdilar. Qaytaraman, yosh futbolchilarimning o‘yinidan qoniqdim.
