Shu yilning 23-29 mart kunlari Toshkentda O‘zbekiston kubogining saralash uchrashuvlari bo‘lib o‘tadi va unda 15 ta jamoa 1,5 ta yo‘llanma uchun kurashga kirishadi. 

Yo‘llanmalar sonining aniq ko‘rinishi 15 mart kuni bo‘lib o‘tadigan “Baniyas” — “Nasaf” uchrashuvi natijasiga bog‘liq. Bellashuvda qarshiliklar zafar quchsa, saralash o‘yinlari yakuniga ko‘ra 2 ta jamoa O‘zbekiston kubogining guruh bosqichiga yo‘l oladi. Aks holda, faqatgina 1 ta jamoada bunday imkoniyat bo‘ladi. 

Reglamentdan kelib chiqib, saralashda Birinchi liga jamoalari (4 ta farm-klub bundan mustasno) hamda Ikkinchi ligalarning g‘olib jamoalari hududiy assosiasiyalarning kafolati ostida ishtirok etadi. Ikkinchi ligalarning hududiy g‘oliblari sifatida Buxoroning “Binokor” va Toshkent viloyatining “Keles” jamoalari musobaqaga qo‘shildi. Shuningdek, pulka o‘yinlariga ko‘ra Birinchi liga yo‘llanmasini qo‘lga kiritgan, ammo talab etilgan hujjatlarni vaqtida topshira olmagan “Denov” jamoasi ham kubok saralashiga taklif etilgan. 

Qur’a yordamida jamoalar 1/8 finaldagi raqiblarini aniqlab oladi. Faqatgina bitta omadli jamoa avtomatik ravishda ¼ final yo‘llanmasiga ega chiqadi. Bitta uchrashuvdan iborat o‘yinlar yakuniga ko‘ra mag‘lub jamoalar musobaqani tark etadi. Reglamentning 20.1-bandidan kelib chiqib, saralash uchrashuvlarining asosiy vaqtida g‘olibni aniqlashning imkoni bo‘lmasa, qo‘shimcha taymlarsiz navbat penaltilar seriyasiga beriladi.

Avvalroq xabar berilganidek, saralash uchrashuvlariga qur’a 19 mart kuni "Sport" telekanali orqali jonli efirda tashlab beriladi.