Bu yil o‘z omadini “Andijon” klubida sinab ko‘risha qaror qilgan serbiyalik tajribali himoyachi Vladimir Bubanya juda tez fursatlar ichida yangi jamoasiga moslashib ketdi.

Kutilganidek, maydonda o‘z o‘yini hamda tajribasi bilan yoshlarga namuna bo‘lyapti. “Yangiyer-Quruvchi” ustidan qozonilgan g‘alabadan keyin serbiyalik legioner “Andijon” matbuot xizmati tomonidan berilgan bir qator savollarga javob qaytardi.

- “Yangiyer-Quruvchi”ga qarshi o‘yin haqida fikringiz qanday?

- Biz chiroyli futbol o‘ynamadik. Lekin eng asosiysi, uch ochkoni qo‘lga kiritib g‘alaba qozondik. O‘tgan safargi uchrashuvda jamoamizda 4 ta golli imkoniyat bo‘lgandi. Biroq o‘shanda yaratilgan vaziyatlarimizdan foydalana olmagandik. Xudoga shukr, bu safar o‘z maqsadimizga erishdik.

- “Andijon” birinchi turda kutilmaganda durang o‘ynadi. Bunga nima sabab bo‘ldi?

- Birinchi turda hamma narsa bo‘lishi mumkin. Moslashish ham qiyin bo‘ladi. Biz buni bilardik. Shunchaki, o‘xshamadi. Boya aytganimdek, imkoniyatlarimizdan foydalana olmadik. Shu bois durang o‘ynadik, bu – futbol.

- Bilamizki, siz O‘zbekistonda asosan Superligada o‘ynab kelgansiz. Bu yil esa pro ligada to‘p suryapsiz...

- To‘g‘ri, men faqat Superligada o‘ynaganman. Rostini aytsam, ilgari pro liga o‘yinlarini ko‘rmagandim. Lekin endi bu yerdagi o‘yinlarni ko‘rib shunga amin bo‘lyapmanki, pro liganing ham saviyasi ancha yuqori ekan. Har bir klub futbol o‘ynashga, o‘z o‘yinini ko‘rsatishga qodir.

- Sizda “Andijon” klubida hammasidan ham ko‘ra ko‘proq nima qiziqarliroq tuyulyapti?

- Shahar juda chiroyli. Shuningdek, muxlislarga gap yo‘q. Andijonlik fanatlar xuddi serbiyalik ishqibozlarga o‘xshagan ekan.

- Vladimir, “Andijon” taklifini qabul qilishingizga asosiy sabab nima bo‘ldi?

- Men murabbiy bilan oldin ham birga ishlaganman. Bu yerda aniq maqsad bor va bu haqiqiy adrenalin. Har bir o‘yinda g‘alaba qozonishimiz kerak.

- Siz doim 15-raqam ostida to‘p surasiz. Buning ma’nosi nimada?

- Bu shunchaki mening o‘z raqamim xolos. Bunda ortiqcha hech qanday ma’no yo‘q.