"Real" jamoasi bosh murabbiyi Karlo Anchelotti La Liganing 28-turida «Malyorka»ustidan qo‘lga kiritilgan (3:0) g‘alaba haqidagi fikrlarini bildirdi.

“Ushbu o‘yinda biz yaxshi o‘ynadik, uning yo‘nalishini nazorat qildik. Biroq, bu oson bo‘lmadi, chunki «Malyorka» birinchi bo‘limni yaxshi o‘tkazdi. Vinisiusning golidan keyin ishimiz sal osonlashdi, ammo jarohatlar va almashtirishlar tufayli biroz muammolar yuzaga keldi.

«Malyorka» himoyada agressiv va sifatli o‘ynadi, aniq uzatmalardan to‘g‘ri foydalandi va qanday o‘ynash kerakligini yaxshi tushundi. Hatto gol urish uchun yaqqol imkoniyatga ham ega bo‘ldi.

Yakkakurashlar juda ko‘p bo‘ldi, lekin hakam o‘yinni yaxshi boshqardi, bu ba’zan oson bo‘lmaydi. Menimcha, hakamlar o‘z ishlarini yaxshi olib borishdi.

Benzema va Rodrigolarning jarohatlari haqida hozircha hech narsa ayta olmayman, tibbiy tekshiruv natijalarini kutishimiz kerak. Umid qilamanki, jarohatlar unchalik jiddiy emas”, - dedi «Real» bosh murabbiyi.