"Реал" жамоаси бош мураббийи Карло Анчелотти Ла Лиганинг 28-турида «Мальорка»устидан қўлга киритилган (3:0) ғалаба ҳақидаги фикрларини билдирди.
“Ушбу ўйинда биз яхши ўйнадик, унинг йўналишини назорат қилдик. Бироқ, бу осон бўлмади, чунки «Мальорка» биринчи бўлимни яхши ўтказди. Винисиуснинг голидан кейин ишимиз сал осонлашди, аммо жароҳатлар ва алмаштиришлар туфайли бироз муаммолар юзага келди.
«Мальорка» ҳимояда агрессив ва сифатли ўйнади, аниқ узатмалардан тўғри фойдаланди ва қандай ўйнаш кераклигини яхши тушунди. Ҳатто гол уриш учун яққол имкониятга ҳам эга бўлди.
Яккакурашлар жуда кўп бўлди, лекин ҳакам ўйинни яхши бошқарди, бу баъзан осон бўлмайди. Менимча, ҳакамлар ўз ишларини яхши олиб боришди.
Бензема ва Родриголарнинг жароҳатлари ҳақида ҳозирча ҳеч нарса айта олмайман, тиббий текширув натижаларини кутишимиз керак. Умид қиламанки, жароҳатлар унчалик жиддий эмас”, - деди «Реал» бош мураббийи.
