Birlashgan Arab Amirliklarining "Baniyas" klubi bosh murabbiyi Daniel Iseyle kecha matbuot anjumanida ishtirok etib, "Nasaf"ga qarshi bo‘ladigan Osiyo chempionlar ligasi bahsi oldidan o‘z fikrlarini bildirib o‘tdi.

"Osiyo chempionlar ligasida ishtirok etish uchun biz uchun sharafli. Saralash o‘tib, guruh bosqichiga chiqish uchun qo‘ldan kelgan barcha ishni qilamiz.

Menda xalqaro musobaqada ishtirok etish tajribasi mavjud. Ruminiyadagi faoliyatim davomida xalqaro musobaqalarda qatnashadigan klublarga qarshi o‘yinlarda ishtirok etganman. Ushbu tajribamni futbolchilarga yetkazishga harakat qilaman. Ertaga samarali harakat qilib, g‘alaba qozonishga intilamiz.

Barcha xalqaro musobaqada ishtirok etishni istaydi. Ushbu musobaqa "Baniyas" nimalarga qodirligini ko‘rsatish uchun yaxshi imkoniyat.

"Nasaf"ning bir nechta o‘yinlarini tomosha qildik va ularni tahlil qildik. Bu jamoa yaxshi himoya chizig‘iga ega. "Nasaf" osonlikcha taslim bo‘lmaydi. Bu jamoa to‘p bilan yengil harakat qiladi. Shu bois, ertangi o‘yin oson bo‘lmasligini bilamiz.

Jamoamiz safida Ahmad Shodiya maydonga tusha olmaydi, qolgan futbolchilar o‘yinda ishtirok etishga tayyor. So‘nggi 3ta o‘yinda g‘alaba qozonganimiz uchun futbolchilarning kayfiyati yuqori. Bu esa OCHLda keyingi bosqichga chiqishimiz uchun bizga yordam beradi. Men futbolchilarimga ishonaman", — dedi ruminiyalik mutaxassis.