Chempionlar ligasining 1/8 final javob o‘yinida "Yuventus" jamoasi o‘z maydonida "Vilyarreal"ga 0:3 hisobida imkoniyatni boy berib, turnirni tark etdi. Birinchi o‘yin 1:1 hisobidagi durang bilan yakunlangandi. Uchrashuvdan keyin "Yuventus" bosh murabbiyi Massimiliano Allegri o‘z fikrlari bilan o‘rtoqlashdi.

«65 daqiqa o‘zimiz xohlagan o‘yinni ko‘rsatdik, yigitlar yaxshi o‘ynashdi. Qaysidir pallada «Vilyarreal» himoyaga o‘tdi va bitta vaziyat hammasini ostin-ustun qilib yubordi.

Biz bu mag‘lubiyatni qabul qilishimiz kerak, lekin bu juda xunuk. Lekin yigitlardan nolimayman, ular yaxshi o‘ynashdi. Men hech kimdan g‘azabda emasman.

Men Emerini tabrikladim, u bu o‘yinga to‘g‘ri yondashdi - bu uning odatiy uchrashuvlaridan biri edi. Biz oldinga borishimiz kerak, mag‘lubiyatni o‘ylab yurish hech kimga yordam bermaydi.

Futbol shunday. Ba’zida ishlar sizning foydangizga, ba’zida esa zararingizga ishlaydi. Buni faqat qabul qilish kerak.

Biz to‘pni siljitishga harakat qildik. «Vilyarreal» hatto to‘qqiz nafar futbolchisi bilan himoyada o‘ynadi, kerak bo‘lsa qarshi hujumga o‘tishga ham urinmadi.

Birinchi bo‘limda bizda imkoniyatlar bo‘ldi, raqib esa qo‘shimcha vaqtni maqsad qilgan yoki ba’zi vaziyatlardan maksimal darajada foydalanmoqchi edi. Birinchi penaltida biz juda sodda harakat qildik. Keyin yana ikkita gol o‘tkazib yubordik va o‘yin nazoratini qo‘ldan boy berdik”, — dedi «Yuventus» bosh murabbiyi Amazon Prime Italia bilan suhbatda.