Osiyo qit’asida JCH-2022 saralash bosqichidan o‘rin olgan navbatdagi tur o‘yinlari bo‘lib o‘tmoqda. "B" guruhida markaziy o‘yin bo‘lib o‘tdi va mazkur bahs natijasi Mundialga chiqqan 2ta jamoaning nomini aniqlab berdi.
Avstraliya terma jamoasi o‘z uyida Yaponiyani qabul qilib, 0:2 hisobida imkoniyatni boy berdi. Yaponiyaliklar g‘alaba to‘plarini so‘nggi daqiqalarda kiritishdi. Uchrashuvning 89 va 90+4-daqiqalarida Kauro Mitoma tomonidan urilgan gollar "kunchiqar yurt" termasiga g‘alaba keltirdi.
Natijada Yaponiya muddatida avval Qatar-2022 yo‘llanmasini qo‘lga kiritdi. Bu natija Saudiya Arabistoniga ham qo‘l keldi hamda arablar ham Mundialda ishtirok etadigan bo‘lishdi.
Avstraliya esa "B" guruhida 3-o‘rinni egalladi. Endi "kengurular" JCH yo‘llanmasi uchun uzun yo‘lni bosib o‘tishlari kerak. Yashil qit’a vakillari dastlab "A" guruhida 3-o‘rinni egallagan jamoa (hozirda bu o‘rinni BAA egallab turibdi) bilan pley-off bosqichida ishtirok etdi. Unda g‘olib chiqqan terma jamoa KONMEBOL mintaqasida 5-o‘rinni band etgan termaga qarshi maydonga chiqadi.
Osiyodan Jahon chempionatiga boradigan 4ta jamoa esa ma’lum bo‘ldi: Eron, Janubiy Koreya, Yaponiya va Saudiya Arabistoni.
