Pro ligada Superliga yo‘llanmasini ko‘zlagan jamoalar bisyor. Demak, mavsum qizg‘in kechishidan umid bor. Quyida ushbu divizionda to‘p surayotgan, o‘z vaqtida elita havosidan bahramand bo‘lgan yulduz futbolchilar xususida so‘z yuritamiz.
Shahboz ERKINOV («Andijon»)
Viktor Kumikov tarkibni kuchaytirish ishlarida tajribasi katta o‘yinchilarga e’tibor qaratdi. Shahboz Erkinov shular jumlasidan. O‘tgan ikki mavsumni «Bunyodkor» safida o‘tkazgan hujumchi Pro liga ishtirokchisidan tushgan taklifni qabul qildi. Aslida «Andijon» o‘tgan yili Erkinovni nishonga olgan, biroq kelishuv amalga oshmagandi. Ko‘ramiz, endi futbolchi ishonchni oqlay olarmikan?
Suhrob BERDIYEV («Yangiyer-quruvchi»)
Qo‘qonlik muxlislar yoqimtoyiga aylangan Berdiyev qishda bir nechta takliflarga ega bo‘lgandi. Jarohati sababli ancha vaqt jamoasiga yordam berolmadi. 2021 yilgi mavsumning aksar qismini zaxirada o‘tkazgan futbolchi «Qo‘qon-1912» bilan shartnomasi yakuniga yetgach, bir muddat «Surxon» mash-g‘ulotlarida ishtirok etdi, shuningdek, unga «Andijon» va xorij jamoalaridan ham chorlov bo‘ldi. Lekin kutilmaganda, Berdiyev transfer oynasining so‘nggi kunlarida «Yangiyer-quruvchi»dan tushgan taklifni qabul qildi. Pro liganing ilk turida u antiqahramonga aylandi: «g‘ijduvon»-ga qarshi bahsda penaltidan foydalana olmadi.
Bobur DAVLATOV («Andijon»)
2011 yili Meksika yashil maydonlarida o‘tkazilgan o‘smirlar o‘rtasidagi jahon chempionatida ajoyib o‘yinlar ko‘rsatgan Davlatov faoliyatida ham pasayish kuzatilmoqda. Qaysidir ma’noda, jarohatlar ham uning faoliyatiga ta’sir ko‘rsatdi. Asosan Rossiya va Qozog‘istondagi faoliyatidan so‘ng futbolchi o‘tgan mavsumni «Metallurg»da o‘tkazdi. Bekobodliklar safida ham yetarli imkoniyatga ega bo‘lmagach, «Andijon»dan qo‘nim topdi.
A’zam ALIYEV («Turon»)
Namangan futboli tarbiyalanuvchisi bo‘lgan Aliyev bu mavsum ham Pro ligada to‘p suradi. O‘tgan mavsumni «Neftchi»da o‘tkazib, jamoa bilan Superligaga yo‘llanma olgan yarim himoyachi endi bu ishni yaypanliklar bilan uddalash niyatida. Aliyev - tezkor o‘yinchi, maydonni ham yaxshi ko‘ra oladi. Muhim vaziyatlarda jamoadoshlarini golli vaziyatarga chiqaradi. Qisqasi, u Pro liganing eng yaxshi futbolchilaridan biridir.
Obid JO‘RABOYEV («Buxoro»)
Yana bir Namangan futboli vakili yangi mavsumni «Buxoro»da boshladi. Jo‘raboyev 2021 yili «Dinamo»ning Superligaga chiqishiga katta yordam bergandi. Kutilmaganda, Samarqand klubi rahbariyati vazifa bajarilganidan so‘ng ko‘plab futbolchilar bilan xayrlashdi, jumladan, Jo‘raboyev ham jamoani tark etdi. Hakim Fuzaylov «Buxoro» bosh murabbiyi etib ta-yinlanganidan so‘ng, sobiq shogirdlarini o‘z oldiga chorladi. Ular orasida Jo‘raboyev ham bor. Jamoaning vazifasi o‘zgarmagan - Superligaga chiqish.
Abduqahhor HOJIAKBAROV («Yangiyer-quruvchi»)
Katta tajribaga ega qanot himoyachisi faoliyatida pasayishlar kuzatilmoqda. O‘tgan mavsumni «Turon»da o‘tkazgan Hojiakbarov asosan zaxirada qolib ketdi. Yaypanliklar elitadan tushib ketganidan so‘ng Abduqahhorga bir qator takliflar bo‘ldi. Lekin yakunda u ham Pro ligada o‘ynashga qaror qilib, «Yangiyer-quruvchi» taklifiga ijobiy javob berdi. Agar mahoratli qanot himoyachisi to‘liq sport formasiga tushib olsa, jamoasiga yordam berishi turgan gap.
IZZATBEK tayyorladi
