«Manchester Yunayted» va Fransiya terma jamoasi yarim himoyachisi Pol Pogba «qizil iblislar»ning joriy mavsumdagi o‘yinlari haqidagi fikrlari bilan o‘rtoqlashdi.
«Mavsumimga baho berish men uchun qiyin. Chunki murabbiy almashishdan tortib to jarohatimgacha juda ko‘p narsa yuz berdi. Biz endi sovrinlar uchun kurashmaymiz, shuning uchun men unga neytral baho bergan bo‘lardim», - deya Pogbaning so‘zlarini keltiradi Telefoot.
Yarim himoyachi, shuningdek, «Manchester Yunayted» sovrin qo‘lga kirita olmaganidan juda xafa bo‘lganini tan oldi. Futbolchi hali kelajagi borasida bir qarorga kelmaganini, faqat mavsumni yaxshi yakunlamoqchi ekanligini takidladi.
29 yoshli Pogba joriy mavsumda «Yunayted» safida barcha turnirlarda 23 ta o‘yinda maydonga tushib, 1 ta gol va 9 ta golli uzatmani amalga oshirdi. Fransiyalik futbolchining mankunianliklar bilan amaldagi shartnomasi shu yozda yakuniga yetadi.
