«Yuventus» «Barselona» hujumchisi Memfis Depayga yana qiziqish bildirmoqda, deb xabar beradi Mundo Deportivo.

«Byankonerlar» Depayni «Lion» bilan shartnomasi tugaganidan keyin, yozda tekinga qo‘lga kiritmoqchi edi, ammo keyin futbolchi «Barselona»ni tanlagandi.

Kataloniya klubiga Obameyang kelishi bilan Depay zaxira futbolchisiga aylandi va hujumchi klubini o‘zgartirish haqida o‘ylayotganini bir necha bor ta’kidladi.

Bu «Yuventus»ga yana bir bor 28 yoshli futbolchining transferiga e’tibor qaratishga asos bo‘ldi.

Joriy mavsumda Depay La Ligada 20 ta o‘yin o‘tkazib, 10 ta gol urdi va 2 ta golli uzatmani amalga oshirdi.