Joriy yilning 7-27 aprel kunlari Saudiya Arabistonida OCHL guruh bosqich o‘yinlari markazlashgan tartibda o‘tkaziladi. «E» guruhida mamlakatimiz sharafini Qarshining «Nasaf» jamoasi ham himoya qiladi. Shu munosabat bilan maxsus muxbirimiz safar oldidan «ajdarlar» bosh murabbiyi Ro‘ziqul Berdiyevdan intervyu oldi.
- Ro‘ziqul Sa’dullayevich, «Nasaf» OCHL guruh bosqich o‘yini oldidan «Lokomotiv» ustidan g‘alaba qozondi. Mavsumdagi dastlabki yutuq bilan tabriklaymiz.
- Katta rahmat. Juda xursandmiz. Yigitlar bu yutuqqa o‘z mehnatlari bilan erishishdi. Chunki oldingi ikki o‘yinda durang qayd etilgandi. G‘alabaga tashnalik jamoamizni 3 ochko uchun maydonda murosasiz kurash olib borishga undadi. OCHL guruh bosqichi o‘yinlari arafasidagi muvaffaqiyat jamoamizga yanada ko‘tarinkilik bag‘ishlaydi.
- Chempionlar Ligasidagi raqiblar jiddiy, ularga qarshi kechadigan o‘yinlar oson bo‘lmasligi aniq. Umuman, ushbu jamoalar o‘yini qay darajada o‘rganildi?
- «Al-Sadd»ni yaxshi bilamiz. Ularga qarshi OCHL doirasida ikki marta o‘ynaganmiz. Bu qit’amizdagi nomdor jamoalardan biri. «Al-Faysali» bilan esa yaqindan tanish emasmiz. Lekin shuni alohida qayd etish lozimki, Saudiya Arabistoni klublari ancha tajribali, kuchli. Jamoa o‘yinlarini atroflicha o‘rganib, shogirdlarimga zarur ko‘rsatmalarni beraman. «Al-Vihdat» Iordaniya chempionatida g‘oliblik uchun kurashadigan klublardan biri. OFK kubogida bu jamoaga ham to‘qnash kelganmiz.
- Tarkibdan ko‘nglingiz to‘qmi? Jarohatlar yo‘qmi? G‘olib G‘aybullayev, qolaversa, «Lokomotiv» bilan o‘yinda jarohat olgan Sherzod Nasrullayevning holati qanday?
- G‘olibning ahvoli haqida oldingi intervyularda aytgandim. Sherzodning esa jarohati jiddiy bo‘lib chiqdi. Nasrullayev jamoamizning yetakchi o‘yinchisi bo‘lgani holda, keng ko‘lamli ishni bajarardi. Nachora, yigitlarimizning tezroq sog‘ayib, safga qaytishlarini kutib qolamiz. Endi mavjud imkoniyatimizdan foydalanib, ularning o‘rnini zaxira futbolchilari hisobiga to‘ldiramiz.
- Ushbu nufuzli musobaqadan ko‘zlangan maqsad qanday?
- O‘yinlar oson kechmaydi. Dastlabki uchrashuv 8 aprel kuni «Al-Sadd»ga qarshi kechadi. Ushbu jamoa tarkibi Qatar milliy termasi o‘yinchilaridan iborat. Bugungi kunda «Barselona»ni boshqarayotgan Xavining sobiq jamoasi. «Al-Sadd» bilan Qarshida bo‘lib o‘tgan dastlabki uchrashuvda 1:0 hisobida g‘alaba qozonganmiz. Bu gal ham bor kuchimiz bilan o‘ynaymiz, raqibni yengishga jamoamizning qurbi yetadi. Garchi «Nasaf» tarkibi yoshlardan iborat bo‘lsada, ular xalqaro maydon havosidan nafas olishga ulgurishgan. OCHL bahslarida bu boradagi tajribamiz yanada oshadi. Maksimal natija uchun kurashamiz. O‘ziga xos imtihon bo‘ladigan bahslarda guruhdan chiqish uchun astoydil intilamiz. Bizni, shu bilan birga, «D» guruhi a’zosi «Paxtakor»ning zafarli odimini mamlakatimizdagi ko‘psonli muxlislar kutib turishibdi. O‘zbekiston nomidan xorij maydonida to‘p surish yuksak mas’uliyat bo‘lish bilan birga sharaf va faxr hamdir.
- Sizga va jamoangizga OCHL guruh bosqich o‘yinlarida omad tilaymiz. Xorij maydoni o‘zbek klublariga zafar keltirsin.
- Tashakkur. Ana shunday ezgu istaklar hammamizga yor bo‘lsin.
Husan TEMIROV suhbatlashdi
