OCHL guruh bosqichi 1-tur doirasida bo‘lib o‘tgan "As Sadd" - "Nasaf" jamoalari o‘rtasidagi uchrashuv yakuniga yetgach, Ro‘ziqul Berdiyev matbuot anjumanida ishtirok etdi.
- Bugungi o‘yin esda qolarli voqealarga boy bo‘ldi. Ko‘p vaziyatlar, qizil kartochkalar... "As Sadd" bilan durang yomon natijasi emas, lekin o‘yinni ketishiga qaraganda, g‘alaba qozonishimiz shart edi.
- Bugun "Nasaf" bir ochko oldimi yoki ikki ochko yo‘qotdimi?
- O‘yindan oldin raqibning kuchini hisobga olgan holda bir ochko oldik degan bo‘lardik, ularning kamchilik qolganini hisobga oladigan bo‘lsak, "Nasaf" ikki ochko yo‘qotdi.
- Jamoa ikki kishi ko‘p bo‘lib o‘ynadi. Bunday vaziyatda, garchi raqib "As Sadd" bo‘lgan taqdirda ham "Nasaf" raqibini jarima maydonchasiga qamab qo‘yishi va sanoqsiz zarbalar berishi kerak edi. Lekin, unday bo‘lmadi, faqatgina o‘yinning so‘nggi 10 daqiqasida "Nasaf" o‘ziga keldi. Shunda ham, so‘nggi 30 daqiqada raqib darvozasiga atigi ikkita zarba berdi. Bu haddan tashqari kam emasmi?
- Albatta, bu jamoaning asosiy kamchiligi. Bu narsa avval ham bo‘lgan, hozir ham bo‘lyapti. Chunki, o‘sha vaziyatlarda oxirgi pasni beradigan, oxirgi zarbani beradigan o‘yinchi topilmayapti. Ammo, bir narsaga e’tibor qaratgan bo‘lsanglar, raqib kamchilik bo‘lib qolganida butun jamoa bo‘lib hisobga "yotib olishdi". Bizdan talab qilinadigan narsa - qanotdan yaxshi pas berish va zarbalar yo‘llash edi. Lekin bu rejamiz bugun o‘xshamadi. Biroq, raqib "As Sadd" ekanligini unutmaslik kerak. Kam bo‘lib qolgan bo‘lsada, qarshi hujumda bizga vaziyat yarata oldi. Shu sababli, har qanday holatda ham bu jamoaga qarshi doim ehtiyot bo‘lish kerak" - dedi "Nasaf" ustozi.
