ОЧЛ гуруҳ босқичи 1-тур доирасида бўлиб ўтган "Ас Садд" - "Насаф" жамоалари ўртасидаги учрашув якунига етгач, Рўзиқул Бердиев матбуот анжуманида иштирок этди.

- Бугунги ўйин эсда қоларли воқеаларга бой бўлди. Кўп вазиятлар, қизил карточкалар... "Ас Садд" билан дуранг ёмон натижаси эмас, лекин ўйинни кетишига қараганда, ғалаба қозонишимиз шарт эди.

- Бугун "Насаф" бир очко олдими ёки икки очко йўқотдими?

- Ўйиндан олдин рақибнинг кучини ҳисобга олган ҳолда бир очко олдик деган бўлардик, уларнинг камчилик қолганини ҳисобга оладиган бўлсак, "Насаф" икки очко йўқотди.

- Жамоа икки киши кўп бўлиб ўйнади. Бундай вазиятда, гарчи рақиб "Ас Садд" бўлган тақдирда ҳам "Насаф" рақибини жарима майдончасига қамаб қўйиши ва саноқсиз зарбалар бериши керак эди. Лекин, ундай бўлмади, фақатгина ўйиннинг сўнгги 10 дақиқасида "Насаф" ўзига келди. Шунда ҳам, сўнгги 30 дақиқада рақиб дарвозасига атиги иккита зарба берди. Бу ҳаддан ташқари кам эмасми?

- Албатта, бу жамоанинг асосий камчилиги. Бу нарса аввал ҳам бўлган, ҳозир ҳам бўляпти. Чунки, ўша вазиятларда охирги пасни берадиган, охирги зарбани берадиган ўйинчи топилмаяпти. Аммо, бир нарсага эътибор қаратган бўлсанглар, рақиб камчилик бўлиб қолганида бутун жамоа бўлиб ҳисобга "ётиб олишди". Биздан талаб қилинадиган нарса - қанотдан яхши пас бериш ва зарбалар йўллаш эди. Лекин бу режамиз бугун ўхшамади. Бироқ, рақиб "Ас Садд" эканлигини унутмаслик керак. Кам бўлиб қолган бўлсада, қарши ҳужумда бизга вазият ярата олди. Шу сабабли, ҳар қандай ҳолатда ҳам бу жамоага қарши доим эҳтиёт бўлиш керак" - деди "Насаф" устози.