Angliya chempionati 32-tur uchrashuvlari davom etmoqda.
Biroz avval, "Manchester Yunayted" safarda «Everton» mehmoni bo‘ldi hamda Gordonning goli evaziga imkoniyatni boy berib qo‘ydi.
Mazkur bahsda maydonga tushgan Markus Reshford "qizil iblislar" tarkibida Premyer-Ligadagi 200-o‘yinini o‘tkazdi va ushbu natijaga erishgan eng yosh futbolchiga aylandi (24 yosh, 160 kunlik). Bunga qadar rekord Rayan Giggsga (24 yosh, 295 kunlik) tegishli edi.
"Manchester Yunayted" APL doirasida germaniyalik murabbiy Ralf Rangnik boshqaruvidagi 17-o‘yinini o‘tkazdi. Jamoa shulardan 8 bahsda g‘alaba qozongan. Bu manchesterliklarning musobaqadagi istalgan murabbiy qo‘lostidagi eng kam foizli g‘alaba ko‘rsatkichi (47%) hisoblanadi.
Ayni vaqtda «Chelsi» safarda «Sautgempton»ni 6:0 hisobida mag‘lub etmoqda. Mazkur bellashuvdagi birinchi gol 8-daqiqada Markos Alonso tomonidan kiritildi. Unga to‘pni Meyson Maunt uzatib bergandi. Oradan 8 daqiqa o‘tib, angliyalik yarim himoyachining o‘zi nomini tabloga yozdirib qo‘ydi va hisobni 0:2 ko‘rinishiga keltirdi.
Shu tariqa, Mauntning joriy mavsum APLda gol va assist qayd etgan o‘yinlari soni 5taga yetdi. Faqatgina Muhammad Salah joriy mavsumda mazkur ko‘rsatkichni qayd eta olgan.
«Chelsi» 21-daqiqaning o‘zida 3:0 hisobida oldinda borayotgan edi. Bu klubning musobaqa tarixida safardagi o‘yinlaridagi eng tezkor 3 gol farqi bilan oldinda borishi hisoblanadi.
Bahsning 31-daqiqasiga kelib londonliklar «Sautgempton» darvozasiga to‘rtinchi to‘pni ham kiritishdi. Bu mehmon o‘yinida 4 to‘p farqi bilan oldinda borish bo‘yicha APL tarixidagi eng tezkor ikkinchi natija hisoblanadi. E’tiborlisi, birinchi ko‘rsatkich ham aynan «Chelsi» klubiga tegishli. Jamoa 2011 yilning oktyabr oyida «Bolton» maydonida 27-daqiqaning o‘zida 4 gol farqi bilan oldinda borgan.
«Sautgempton» Premyer-Ligadagi ishtiroki mobaynida 21-marotaba bir bo‘limning o‘zida 4 va undan ko‘proq gol o‘tkazib yubordi. Shulardan 7 o‘yin (33%) Ralf Xazenxyuttl boshqaruvida kuzatilgan.
