Turinning «Yuventus» jamoasi chap qanoti himoya chizig‘ini kuchaytirish ustida ishlamoqda. La Gazzetta dello Sport xabariga ko‘ra, «keksa sinyora» joriy mavsumda «Lion»da ijara asosida to‘p surayotgan «Chelsi» himoyachisi Emerson bilan shartnoma imzolamoqchi.

Qayd etilishicha, kelasi yozda jamoani tark etishi mumkin bo‘lgan braziliyalik Aleks Sandroning o‘rniga Emerson «Yuventus» rahbariyatiga ma’qul variant hisoblanadi.

Eslatib o‘tamiz, joriy qishda «Chelsi» himoyadagi kadrlar bilan bog‘liq muammo tufayli Emersonni «Lion»dan ortga qaytarmoqchi edi, biroq fransuz klubi futbolchini 4 million yevro tovon puli sabab qaytarishdan bosh tortdi.