«PSJ» bosh murabbiyi Maurisio Pochettinoning fikricha, Parij klubi Fransiya chempionatidagi g‘alabasini nishonlashga hali erta.

Parijliklar chempionat yakuniga olti tur qolganida, asosiy ta’qibchisi «Marsel»ni (2:1) mag‘lub etib, oradagi farqni 15 ochkoga yetkazdi.

«Mavsum hali tugamagan. 15 ochko - yaxshi natija, ammo biz g‘alaba qozonishda davom etishimiz kerak. Endi yosh futbolchilarimizga imkoniyat berishimiz mumkin. O‘ylaymanki, biz motivasiyani yuqori darajada ushlab turish yo‘lini topamiz», — dedi Pochettino.

Argentinalik murabbiy chempionatdagi asosiy raqibi ustidan qozonilgan g‘alaba haqida shunday fikr bildirdi.

«Biz g‘alaba qozondik – bu asosiysi, lekin o‘yinimizni yanada yaxshilashimiz kerak. Birinchi bo‘limda yaxshi o‘ynadik, hamda ko‘plab vaziyatlar yaratdik. O‘ylaymanki, biz o‘yinni to‘liq nazorat qildik va g‘alabaga loyiq edik», — deya qo‘shimcha qiladi murabbiy.