«ПСЖ» бош мураббийи Маурисио Почеттинонинг фикрича, Париж клуби Франция чемпионатидаги ғалабасини нишонлашга ҳали эрта.

Парижликлар чемпионат якунига олти тур қолганида, асосий таъқибчиси «Марсел»ни (2:1) мағлуб этиб, орадаги фарқни 15 очкога етказди.

«Мавсум ҳали тугамаган. 15 очко - яхши натижа, аммо биз ғалаба қозонишда давом этишимиз керак. Энди ёш футболчиларимизга имконият беришимиз мумкин. Ўйлайманки, биз мотивацияни юқори даражада ушлаб туриш йўлини топамиз», — деди Почеттино.

Аргентиналик мураббий чемпионатдаги асосий рақиби устидан қозонилган ғалаба ҳақида шундай фикр билдирди.

«Биз ғалаба қозондик – бу асосийси, лекин ўйинимизни янада яхшилашимиз керак. Биринчи бўлимда яхши ўйнадик, ҳамда кўплаб вазиятлар яратдик. Ўйлайманки, биз ўйинни тўлиқ назорат қилдик ва ғалабага лойиқ эдик», — дея қўшимча қилади мураббий.