«Midlsbro»da ijara asosida o‘ynayotgan «Arsenal» hujumchisi Folarin Balogun «Fulxem» qiziqishlari doirasiga tushib qoldi, deb xabar beradi Daily Mail.

Manbaga ko‘ra, «Fulxem» Balogunni mavsum jamoaning asosiy futbolchisi sifatida ko‘rmoqda. Ayni paytda klub 42 uchrashuvdan keyin 83 ochko bilan Chempionship turnir jadvalida ishonchli tarzda peshqadamlik qilmoqda. Ikkinchi o‘rindagi jamoa bilan oradagi farq to‘qqiz ochkoni tashkil qiladi. Shu sabab, futbolchining o‘zi «Kreyven Kottej»ga ijaraga o‘tishga qarshi emas.

Balogun «Midlsbro» safida 2022 yilning yanvaridan buyon to‘p tepadi. Mavsum oxirida u «Arsenal»ga qaytadi. Uning London klubi bilan shartnomasi 2025 yilning yoziga qadar mo‘ljallangan.

Chempionshipda 20 yoshli angliyalik futbolchi 15 ta o‘yin o‘tkazib, 3 ta gol va 2 ta golli uzatmani amalga oshirdi. Futbolchining narxi 4 mln yevroni tashkil qiladi.