Andijon viloyati hokimi Shuhratbek Abdurahmonov bilan ko‘rishdik va «Andijon» klubi masalasida gaplashdik. Bunda 3 ta masala ko‘tarildi:

— «Andijon» klubining moliyaviy holati bilan bog‘liq masala;

— ««Sog‘lom avlod»» stadioni projektorlarini 2000 lyuksgacha ko‘tarish masalasi;

— «Sog‘lom avlod» stadioni drenaji hamda gazonini xalqaro standartga moslashtirish masalasi.

Nasib bo‘lsa, barcha masala ijobiy tomonga hal bo‘ldi. Katta futbolni davlat byudjetidan xalos qilish hamda xususiy tadbirkorga sharoit yaratib berish orqali viloyat futbolini yangi bosqichga olib chiqish bizdagi asosiy masala hisoblanadi. Bu borada viloyat hokimiga o‘z taklifimizni bildirdik va Abdurahmonov bu yo‘nalishda bizni to‘liq qo‘llab-quvvatladi.

Bir masalaga ahamiyat berish kerak. Vaqt o‘tib, O‘zbekistondagi barcha futbol klublari baribir xususiy sektor qo‘liga o‘tadi. Prezident farmonida ham bu holat aks etgan. Shundan kelib chiqib, biz 2030 yilni kutib o‘tirishimiz emas, bosqichma-bosqich shu yo‘nalishda odimlashimiz kerak. «Turon» futbol klubidan keyin «Andijon»ning ham oldinga yurayotgani yoqimli. Rejamiz bo‘yicha 2023 yildan boshlab «Andijon» futbol klubining davlat byudjetiga og‘irligi tushmasligi kerak. Mana shu 1 yil o‘tish davri bo‘ladi, qolganiga tadbirkor klubni o‘zi amallashga harakat qiladi. «Andijon» kelajakda Germaniyaning «Bayer» klubini yodga solib turishidan umidvormiz.

Bizningcha, mana shu qiyin davrlar o‘tsa, bugungi «Turon» va bugungi «Andijon» yaqin 5 yillikning eng normal komandalari bo‘ladi. Bosqichma-bosqich qolganlar ham shu yo‘nalishga o‘tadi. Muhimi 50-60 mlrdlik smetalarni tasdiqlash emas, mehnat bilan topilgan 10-15 mlrdni aql bilan sarf qilish, infrastruktura hamda bolalar futbolini asosiy planga olib chiqish. Shuning uchun ham PFL «Turon» va «Andijon»ga hurmat ko‘zi bilan qaraydi hamda bunday jamoalarni futbolimiz ertasi deb hisoblaydi. Mana shu klublar millionlar o‘yini rivojiga hammadan ko‘proq hissa qo‘shyapti.

P.S. To‘rt yil avval «Andijon»da futbolni jonlantirish uchun real harakatlar boshlangan, «Sog‘lom avlod» stadionida ish qaynagandi. Biroq futbolni cho‘ntak qilib olgan odamlar sabab, viloyat kattalari futboldan bezib ketgan. Biz holatni, prinsiplarimizni va rejalarimizni Abdurahmonovga tushuntirdik. Bugungi uchrashuv uchun viloyat hokimiga minnatdorchilik bildiramiz.    

Kecha yuzdan ziyod andijonlik futbol muxlislari klub taqdiri bilan qiziqib, savollar yog‘dirdi. Futbol muxlisining klubga eng katta yordami — chipta sotib olib o‘yinga kirish hamda har qanday vaziyatda ham o‘z suyuklilarini qo‘llab-quvvatlash. Bu futboldagi eng oddiy marketing. Siz sarf etayotgan 15 ming so‘m klubga eng katta yordamdir. Ishonamizki, «Sog‘lom avlod» kelasi o‘yinlarda muxlislar bilan to‘lib toshadi.

Diyor Imomxo‘jayev