Londonning «Chelsi» klubi yangi xo‘jayini nomini qaysi sanada e’lon qilishi ma’lum bo‘ldi. The Telegraph nashri muxbiri Mett Louning so‘zlariga ko‘ra, «ko‘klar» 31 maydan kechiktirmay yangi rahbarlarini tanishtiradi.
Aynan shu kuni Angliya hukumati tomonidan vaqtinchalik berilgan futbol faoliyatini amalga oshirish uchun lisenziya muddati tugaydi.
Eslatib o‘tamiz, joriy qilingan sanksiyalar tufayli «Chelsi» hozirda o‘yinchilarni sota olmaydi va sotib ololmaydi, shuningdek, futbolchilar bilan yangi shartnoma ham tuza olmaydi. Bu holat himoyachilar Antonio Ryudiger va Andreas Kristensenning «Stemford Brij»dagi kelajagini noaniq bo‘lishiga olib kelmoqda.
