«Ayaks» bosh murabbiyi Erik ten Xag «Manchester Yunayted» bilan shartnoma imzoladi. Bu haqda manchesterliklar matbuot xizmati ma’lum qildi.

Mankunianliklar niderlandiyalik murabbiy bilan 2025 yil iyun oyiga qadar mo‘ljallangan shartnoma imzoladi. Bitimda shartnomani yana bir yilga uzaytirish bandi ham kiritilgan.

Ten Xag 2022/23 yilgi mavsumdan boshlab «qizil iblislar» boshqaruviga o‘tadi. 52 yoshli mutaxassis hozirda «Ayaks»da faoliyat olib bormoqda. «Manchester Yunayted» murabbiy uchun Niderlandiya jamoasiga 2 million yevro tovon puli to‘laydi.

«Ayaks» ten Xag boshchiligida 2 martadan Niderlandiya chempionligi va Niderlandiya Kubogini qo‘lga kiritgan, bir marta Superkubokda zafar quchgan. 2019 yilda amsterdamliklar Chempionlar Ligasi yarim finalida o‘ynagan.

Erik ten Xag faoliyati davomida «Bavariya»ning ikkinchi jamoasi, «Gou Ehed Igls» va «Utrext»da ishlagan. «Manchester Yunayted» murabbiy uchun Niderlandiyadan tashqarida yuqori diviziondagi ilk tajriba hisoblanadi.

«Manchester Yunayted» 2021/22 yilgi mavsum APLda 54 ochko bilan 6-o‘rinda bormoqda.