O‘zbekiston kubogining guruh bosqichi yakuniga yetdi hamda 1/8 finalda o‘ynaydigan 16 jamoa nomiga oydinlik kiritildi.

O‘zbekiston Professional futbol ligasi mazkur bosqich uchrashuvlarini 11-14 avgust sanalariga rejalashtirgan. 23-24 avgust kunlarida ¼ final, 15-16-oktyabrda esa ½ final uchrashuvlari bo‘lib o‘tadi. Buxoro shahridagi final uchrashuvi 29-oktyabrga reja qilingan.

1/8 final bosqichiga qur’a tashlash marosimi “Sport” telekanali bilan kelishuv asosida jonli efirga olib chiqiladi. 28 aprel — payshanba kuni soat 18:00 da telekanal “Bizning futbol” dasturini efirga uzatadi. Mana shu loyiha fonida O‘zbekiston Coca-Cola kubogining 1/8 final uchrashuvlariga qur’a tashlanadi.

Ma’lumot uchun, 1/8 final qur’asi oldidan jamoalar 2 ta savatga ajratib olinadi va bir savatdagi raqiblar o‘zaro raqib bo‘lmaydi. 1-savatdan o‘tgan yilgi chempion hamda kubok sohibi, shuningdek, guruh bosqichi peshqadamlari joy olgan. Bellashuvlar qaysi jamoaning maydonida o‘tishi masalasiga qur’a yordamida aniqlik kiritib olinadi.