«PSJ» hujumchisi Kilian Mbappening klub bilan shartnomasi yakunlanishiga 2 oy qoldi. Ammo fransiyalik futbolchi hali o‘z kelajagi borasida bir qarorga kelmadi.

Ayni paytda 23 yoshli futbolchi "Pari Sen-Jermen" tomonidan berilgan navbatdagi taklifni ko‘rib chiqmoqda. Ma’lumotlarga qaraganda, parijliklar Kilianga 50 million yevrodan ortiqroq yillik maosh taklif qilishgan. Bu orqali Mbappe jamoaning eng ko‘p maosh oladigan futbolchisiga aylanadi. Shuningdek, shartnomaga imzo chekkani uchun «PSJ» Mbappega yaxshigina bonus to‘lashga ham tayyor. Shartnomani uzaytirish borasidagi muzokaralar kelasi haftada Doha shahrida davom etadi. Unda Kilianning onasi ham ishtirok etadi.

«PSJ» Chempionlar ligasidan chiqib ketgach, Mbappe uchun kurashda «Real» favorit sifatida tilga olinayotgandi. Ammo futbolchi imij huquqlari borasida "Qirollik klubi" bilan kelisha olmayapti. Kilian shaxsiy reklamalar orqali topadigan puliga to‘liq egalik qilmoqchi. «PSJ» esa buning bu talabini qondirishga tayyor. Madridliklar bu huquqlarni 50/50ga ko‘rinishda taqsimlashmoqchi.

Mbappe joriy mavsumda "PSJ" safida barcha musobaqalar doirasida 41ta o‘yinda ishtirok etib, 33 gol va 22 assist muallifiga aylandi.