Pro liganing 6-turidagi markaziy o‘yin Yaypanda o‘tkaziladi. “Turon” hamda “Andijon” klublari ishtirokidagi bellashuvga qiziqish juda yuqori darajada, desak mubolag‘a bo‘lmaydi.

Ayni chog‘da “Burgutlar” bo‘lajak o‘yinga har tomonlama puxta tayyorgarlik ko‘rishmoqda.

“Andijon” jamoasining yetakchi futbolchilaridan biri – Abduvohid G‘ulomov “Turon” bilan bo‘ladigan bahs oldidan shunday dedi:

- “Turon” jamoasiga qarshi o‘yinga tayyorgarlikni boshlaganmiz. Jamoadagi kayfiyat a’lo darajada. Biz bo‘lajak uchrashuvda faqat va faqat g‘alaba uchun kurashamiz. Muxlislarimizni, Andijon xalqimizni xursand qilishga bor imkoniyatimizni ishga solamiz.

“Turon” hozirgi paytda turnir jadvalida 1-o‘rinda ketyapti. Bu bejizga emas, ularda ham yaxshi jamoa bor. Tajribali o‘yinchilarga ega, shakllangan jamoa. Ushbu klubga qarshi oson o‘yin bo‘lmasligini bilamiz. Lekin biz g‘alaba uchun oxirigacha harakat qilamiz.

Mashg‘ulotlarda ham astoydil mehnat qilyapmiz. Umid qilamanki, o‘yinni o‘z foydamizga hal qila olamiz. Qilayotgan barcha sa’yi-harakatlarimiz g‘alaba uchun qaratilgan, - deydi G‘ulomov.