"Manchester Siti" bosh murabbiyi Pep Gvardiola Yevropa chempionlar ligasi yarim final bosqichi doirasida bo‘lib o‘tgan «Real»ga qarshi o‘yin (4:3) borasida o‘z fikrini bildirib o‘tdi.

«Har ikki jamoa fantastik o‘yin namoyish etdi. Biz ko‘p jihatdan yaxshi harakat qildik. Afsuski, gollar o‘tkazib yubordik va yanada ko‘proq gol ura olmadik. Ammo ushbu to‘qnashuv ikki o‘yindan iborat. Bir haftadan keyin javob uchrashuvini o‘tkazamiz.

Biz aqlbovar qilmas jamoaga qarshi fantastik o‘yin ko‘rsatdik. Birinchi taymda ularga vaziyat taqdim etdik va ular o‘yinga qaytishdi. Shuning uchun qattiq asabiylashdik. Hammasini yaxshi bajarayotganimizda xavotirsiz o‘ynaymiz. Bundan tashqari, ular kuchli pressing uyushtirishdi.

Gap final yo‘llanmasi haqida ketmoqda, futbolda esa bunday holatlar ro‘y berib turadi. Biz Madridga g‘alaba qozonish uchun boramiz.

Lyorente to‘pni qo‘li bilan o‘ynaganda, «Tottenxem»ga mag‘lub bo‘lib, chempionlar ligasini tark etgandik. Bugun esa to‘p Laportning qo‘liga tegdi. Bunday holatlar ro‘y berib turadi. Biz qilishimiz mumkin bo‘lgan yagona narsa — o‘zimiz bilgan o‘yinni namoyish etish. «Real» esa jazolashga qodir jamoa.

To‘p bilan va to‘psiz namoyish etgan bugungi o‘yinimizdan ortig‘ini talab eta olmayman. O‘yinchilarga dam olish kerakligini aytaman. Endi oldimizdagi eng muhim o‘yin — «Lids»ga qarshi bahs. Keyin esa Madridga g‘alaba qozonish uchun boramiz. Har ikki jamoa hujum qilishga va sifatli o‘yin namoyish etishga harakat qiladi. Futbol — fantastik shou. Karlo Anchelotti va uning jamoasini tabriklayman, ular juda yaxshi o‘ynashdi. Shu bilan birgalikda, bugun finalga chiqishga munosib ekanimizni ko‘rdingiz», – dedi «Manchester Siti» ustozi.