AGMK jamoasi navbatdagi o‘yinni chempionatning amaldagi chempioni - "Paxtakor"ga qarshi safarda o‘tkazadi.
"Paxtakor" yaqindagi OCHL guruh bosqichini Saudiya Arabistonida o‘tkazib, unda muvaffaqiyatsiz qatnashib qaytdi. Amaldagi chempion bilan bo‘ladigan o‘yinga AGMK jamoasi yaxshi kayfiyatda taraddud ko‘rmoqda. "Qo‘qon-1912" ustidan qozonilgan g‘alabadan so‘ng AGMK ushbu muvaffaqiyatli odimni davom ettirgan holda turnir jadvalidagi mavqeini yanada yaxshilashga urinadi.
"Paxtakor" va AGMK jamoalarining o‘zaro o‘yinlar statistikasiga ko‘ra, barcha musobaqalarda o‘tkazilgan jami 31 uchrashuvda "Paxtakor" 23 g‘alabani tantana qilgan, AGMK esa 5 marotaba "paxtakorchilar"dan ustun kelgan. Qolgan 3 bellashuvda g‘olib nomi aniqlanmay durang qayd etilgan. To‘plar nisbati: 62-21, "Paxtakor" foydasiga.
"Paxtakor" safida diskvalifikasiya sabab Ikrom Aliboyev o‘yinni o‘tkazib yuborsa, jamoamizdan Yoshlar Birinchiligi doirasidagi o‘yinda maydondan chetlatilgan Nodir Abdurazzoqov bahsda ishtirok etolmaydi. Shuningdek, ma’lumotlarga ko‘ra, OCHL doirasidagi o‘yinda jarohatlangan Dragan Cheran 2 may kungi uchrashuvga qadar jarohatidan tiklana olmaydi.
Bo‘lajak bahsni yaqindagina jamoamiz ishtirokidagi "Metallurg"ga qarshi o‘yinni boshqargach, natijaga ta’sir qiluvchi xatolari tufayli Superligadan ma’lum muddatga chetlatilgan Firdavs Norsafarov boshqarishi e’lon qilindi. Mazkur o‘yin Norsafarov boshqarayotgan jamoamizning 7-o‘yiniga aylanadi. Firdavs Norsafarov boshqargan o‘yinlarda AGMK 3 g‘alaba, 1 durang va 2 mag‘lubiyat qayd etgan. Uchrashuvda shuningdek VAR tizimidan ham foydalaniladi. Unga mas’ul etib Ahrol Risqullayev tayinlangan.
Superliga, 6-tur.
2 may, dushanba
"Paxtakor" – AGMK (18:30)
Toshkent, "Paxtakor" stadioni.
Hakamlar: Firdavs Norsafarov, Rishat Nugmanov, Shohruh A’zamov, Doston Mirzaraimov
Nazoratchi: Oleg Dachev
VAR hakami: Ahrol Risqullayev
VAR assistenti: Akobirxo‘ja Shukurullayev
Komissar: Bekzod Aripov.
