Braziliyaning «Atletiko Mineyro» klubi hujumchisi Xalk o‘z faoliyati haqida kitob chop etdi, unda 2020 yilda «Tottenxem»ga o‘tkazilmagani sabablari haqida gapirib o‘tdi, deb xabar bermoqda The Sun.

«Shporlar»ning sobiq bosh murabbiyi Joze Mourinyo hujumchini shimoliy Londonga olib kelmoqchi edi, ammo Xalk viza talablariga javob bermadi.

«Menda viza bilan bog‘liq muammo bor edi. Shu sabab Italiya, Ispaniya, Germaniya, Angliya yoki Fransiyada kabi chempionatlarda o‘ynay olmadim.

Ko‘p vaqtimni Xitoyda o‘tkazdim va shuning uchun terma jamoaga chaqirilmadim. Advokatlar hatto maxsus viza olishga ham harakat qilishdi, ammo buning iloji yo‘q edi», - deya Xalkning so‘zlarini keltiradi manba.

Shuningdek, Xalk o‘z vaqtida «Atletiko Madrid» va «Beshiktosh»ga o‘tish imkoniyatiga ega bo‘lgani, biroq transferlar amalga oshmay qolgani aytiladi.

Xalk 2021 yil 10 fevraldan beri «Atletiko Mineyro»da o‘ynamoqda, avvalroq futbolchi Sankt-Peterburgning «Zenit», Portugaliyaning «Portu» va boshqa klublarida to‘p surgan.