Xabaringiz bor, O‘zbekiston futbol assosiasiyasi so‘ngi yillarda UEFA Assist bilan hamkorlikda futbolni rivojlantirish borasida turli yo‘nalishlarda dasturlarni ishga tushirib kelmoqda. Xususan, endilikda “Ayollar uchun futbol” dasturining mamlakatimizda tatbiq etilishga erishildi.
UEFA Assist'ning ushbu dasturi ayollar futbolini rivojlantirish va ayollarning sportga doimiy jalb etilishini ta’minlash, bu ko‘rsatkichni oshirish uchun samarali boshqaruv tuzilmalarini joriy etishni ko‘rsatuvchi keng qamrovli ilmiy seminarlardan iborat. Seminarlar, shuningdek, ayollar futbolini professional darajaga olib chiqish, uning moliyaviy tomonlarini o‘rganish, aholi orasida keng targ‘ib qilish va marketing kabi mavzularni o‘z ichiga oladi.
O‘zbekiston futbol assosiasiyasi butun mamlakat bo‘ylab ayollar futbolini rivojlantirish uchun mustahkam poydevor yaratish siyosatini olib bormoqda. “Ayollar uchun futbol” dasturi xotin-qizlar futbolini rivojlantirish uchun zarur bo‘lgan ko‘nikma va bilimlarni berishi muhimdir.
Ma’lumot uchun, “Ayollar uchun futbol” dasturi UEFA Assist'ning asosiy tarmoqlaridan biri hisoblanadi. O‘zbekistonda mazkur dastur doirasidagi tadbirlar joriy yilning 4-7 may kunlari bo‘lib o‘tishi rejalashtirilgan.
