Хабарингиз бор, Ўзбекистон футбол ассоциацияси сўнги йилларда УЕФА Ассист билан ҳамкорликда футболни ривожлантириш борасида турли йўналишларда дастурларни ишга тушириб келмоқда. Хусусан, эндиликда “Аёллар учун футбол” дастурининг мамлакатимизда татбиқ этилишга эришилди.

УЕФА Ассист'нинг ушбу дастури аёллар футболини ривожлантириш ва аёлларнинг спортга доимий жалб этилишини таъминлаш, бу кўрсаткични ошириш учун самарали бошқарув тузилмаларини жорий этишни кўрсатувчи кенг қамровли илмий семинарлардан иборат. Семинарлар, шунингдек, аёллар футболини профессионал даражага олиб чиқиш, унинг молиявий томонларини ўрганиш, аҳоли орасида кенг тарғиб қилиш ва маркетинг каби мавзуларни ўз ичига олади.

Ўзбекистон футбол ассоциацияси бутун мамлакат бўйлаб аёллар футболини ривожлантириш учун мустаҳкам пойдевор яратиш сиёсатини олиб бормоқда. “Аёллар учун футбол” дастури хотин-қизлар футболини ривожлантириш учун зарур бўлган кўникма ва билимларни бериши муҳимдир.

Маълумот учун, “Аёллар учун футбол” дастури УЕФА Ассист'нинг асосий тармоқларидан бири ҳисобланади. Ўзбекистонда мазкур дастур доирасидаги тадбирлар жорий йилнинг 4-7 май кунлари бўлиб ўтиши режалаштирилган.