Madridning «Atletiko» klubi hujumchisi Xulian Alvares faoliyatini davom ettirish uchun asosiy variantni tanlab oldi. 26 yoshli futbolchiga anchadan beri «Barselona» qiziqish bildirmoqda, shuningdek, uning uchun kurashda Londonning «Arsenal» va «PSJ» klublari ham ishtirok etmoqda.
Jurnalist Fernando Poloning ma’lumotlariga ko‘ra, argentinalik futbolchi Kataloniya klubiga o‘tishni afzal ko‘rmoqda. Hujumchi aynan «Barsa»ga o‘tishni eng jozibador variant deb hisoblaydi. «Ko‘k-anorranglilar» vakillari futbolchi bilan kelishish qiyinchilik tug‘dirmasligiga ishonishmoqda, biroq «Atletiko»ni sotuvga ko‘ndirish juda mushkul bo‘ladi — asosiy muammo ham aynan shunda.
Transfermarkt portali Xulian Alvaresning narxini 90 million yevroga baholamoqda. Jahon chempionining amaldagi shartnomasi 2030 yilgacha mo‘ljallangan.
