«Manchester Siti» bosh murabbiyi Pep Gvardiola Chempionlar Ligasi yarim final javob bahsi doirasida «Real»ga qarshi kechadigan o‘yin oldidan o‘z fikrlarini bildirib o‘tdi.

Avvalgi o‘yindagi tarkibni tanlashi mumkinligi haqida
— Nima bo‘lishini bilmayman. Tarkibni tanlash uchrashuvda g‘alaba qozonishga harakat qilishdir. Ba’zan shunday vaqtlar bo‘ladiki, o‘yin oldi mashg‘ulotlarida yomon harakat qilasan, lekin ajoyib o‘yin o‘tkazasan, ba’zan esa yaxshi tayyorgarlik ko‘rasan, ammo maydonda futbolchilar yomon o‘yin ko‘rsatadi.

Har bir muhim o‘yinlarda «Manchester Siti» yaxshilanib borayotgani haqida
— Siz tajriba haqida gapiryapsiz, ammo hamma gap o‘sha tajribadan nima o‘rganganingizga. Hech narsa o‘rganmasangiz, bir xil xatoni takrorlayverasiz. Biz allaqachon finalda bo‘lganmiz, men finalda bo‘lganman, bu yordam beradi, ammo kafolat bermaydi. Finalga chiqish uchun bor imkoniyatimizni ishga solishimiz lozim.

Klasikoni ko‘rgani haqida
— Faqat e’tiborga loyiq vaziyatlarini ko‘rdim, butun o‘yinni tomosha qilmadim. Karlo Anchelotti doim qo‘llaydigan taktikasini qo‘llamaganini bilaman. Shuning uchun bu o‘yinda bizga yordami tegadigan hech narsa topa olmadim.


«Real» va «Manchester Siti» o‘rtasidagi Chempionlar Ligasi yarim final javob o‘yini 4 maydan 5 mayga o‘tar kechasi 00:00 da boshlanadi. Jamoalar o‘rtasidagi dastlabki o‘yinda «shaharliklar» 4:3 hisobida g‘alaba qozongan.